Sabiex tkun ippreparat, jeħtieġ li jiġu indirizzati xi kunsiderazzjonijiet bażiċi dwar ir-rwol tiegħek fis-suq.
Jiena affettwat?
Id-detenturi tad-dover skont l-Artikolu 45 huma definiti bħala importaturi u utenti downstream li jqiegħdu taħlitiet perikolużi fis-suq. Fil-każijiet kollha, l-obbligu jaqa’ fuq l-entità legali tal-UE, li jfisser li fornitur tat-taħlita mhux Ewropew ma jistax jissostitwixxi detentur tad-dover ibbażat fl-UE. Huwa importanti wkoll li jitqies li t-twettiq tal-obbligu ta’ notifika huwa prekondizzjoni għat-tqegħid tat-taħlita fis-suq – dan jista’ jkun importanti f’każijiet fejn it-tqegħid fis-suq ma jsirx mill-importatur jew mill-utent downstream.
Aktar informazzjoni dwar l-atturi differenti fil-katina tal-provvista u l-attivitajiet li jwasslu għal obbligi ta’ sottomissjoni tista’ tinstab fil-Gwida għall-Anness VIII.
Għal liema taħlitiet jeħtieġ li nissottometti informazzjoni?
L-obbligu japplika għal taħlitiet imqiegħda fis-suq li huma kklassifikati bħala periklu għas-saħħa tal-bniedem jew periklu fiżiku.
Innota li prodotti bijoċidali u prodotti għall-protezzjoni tal-pjanti jaqgħu fl-ambitu ta’ dan l-obbligu, u r-rekwiżiti għas-sottomissjoni tal-informazzjoni japplikaw flimkien ma’ obbligi oħra skont ir-Regolament dwar Prodotti Bijoċidali u r-Regolament dwar Prodotti għall-Protezzjoni tal-Pjanti.
Liema taħlitiet huma eżentati?
L-obbligu li tiġi sottomessa l-informazzjoni ma japplikax għal taħlitiet li jitqiesu perikolużi biss minħabba perikli ambjentali. Taħlitiet eżentati mir-rekwiżiti għas-sottomissjoni tal-informazzjoni jinkludu wkoll:
- taħlitiet radjuattivi;
- taħlitiet soġġetti għal superviżjoni doganali;
- taħlitiet użati fir-riċerka u l-iżvilupp xjentifiċi;
- prodotti mediċinali u veterinarji, prodotti kożmetiċi, apparat mediku u ikel u għalf; u
- taħlitiet ikklassifikati biss bħala gassijiet taħt pressjoni u splussivi.
Meta għandi nagħmel l-informazzjoni disponibbli għaċ-ċentri ta’ kontra l-velenu skont ir-regoli l-ġodda?
Għall-prodotti l-“ġodda” kollha li għadhom mhumiex notifikati skont il-leġiżlazzjoni nazzjonali, għandek tissottometti l-informazzjoni meħtieġa qabel ma tqiegħed it-taħlita fis-suq. Is-sottomissjonijiet għandhom isiru fil-format armonizzat, skont id-data rilevanti tal-applikabbiltà. Id-data tal-applikabbiltà tiddependi mit-tip ta’ użu, jiġifieri l-utent aħħari, tat-taħlita:
- l-1 ta’ Jannar 2021 għal użu mill-konsumaturi jew użu professjonali;
- l-1 ta’ Jannar 2024 għal użu industrijali.
Qabel dawn id-dati, it-taħlitiet jistgħu jkunu soġġetti għal rekwiżiti nazzjonali eżistenti u d-detenturi tad-dover għandhom jikkuntattjaw lill-korp maħtur fil-pajjiż ta’ interess għal aktar informazzjoni.
Għal aktar informazzjoni dwar kif jiġi ddeterminat t-tip ta’ użu tat-taħlita tiegħek u d-data tal-applikabbiltà rilevanti, u r-rekwiżiti tal-informazzjoni, ara pass 3.
U dwar in-notifiki eżistenti?
Tista’ tibbenefika minn perjodu tranżitorju għall-prodotti kollha li tkun innotifikajt preċedentement u li diġà jinsabu fis-suq. Tali notifiki se jibqgħu validi sal-1 ta’ Jannar 2025 jew sakemm isir tibdil fil-prodott (eż. tibdil fil-kompożizzjoni tat-taħlita, fil-karatteristiċi tossikoloġiċi jew fl-identifikaturi tal-prodott).
- Jekk il-prodott tiegħek jeħtieġ sottomissjoni aġġornata minħabba bidliet, din għandha ssir fil-format armonizzat il-ġdid — innota li d-dati differenti ta’ applikabbiltà skont it-tip ta’ użu għadhom japplikaw.
- Jekk il-prodott tiegħek jibqa’ ma jinbidilx sal-1 ta’ Jannar 2025, xorta waħda għandek tagħmel sottomissjoni ġdida fil-format armonizzat, minħabba li mhux ippjanat ċaqliq ta’ data.
- Jekk il-produzzjoni tal-prodott tiegħek tieqaf qabel tmiem il-perjodu tranżitorju, m’għandekx għalfejn tagħmel sottomissjoni ġdida.
